ویب ڈیسک:روس  کی جانب سے یوکرین جنگ کے خاتمے کیلئے  امریکی تجاویز کو مسترد کر دیا گیا۔

روسی نائب وزیر خارجہ سرگئی ریابکوف نے اپنے بیان میں واضح کیا  ہے  کہ امریکا کی پیش کردہ تجاویز روس کے اہم مطالبات کو پورا نہیں کرتیں، اس لیے ان کو موجودہ شکل میں قبول نہیں کیا جا سکتا ہے۔

واضح رہے کہ  روس کی جانب سے یہ بیان ایسے وقت میں سامنے آیا ہے جب امریکی صدر ڈونلڈ ٹرمپ کی روس سے بڑھتی ہوئی ناراضگی کھل کر سامنے آ رہی ہے،ٹرمپ نے ماسکو پر معاہدے میں تاخیر کا الزام لگایا اور روسی تیل خریدنے والے ممالک پر نئی پابندیاں  لگانے  کی دھمکی دی ہے۔

روس کا مؤقف ہے کہ یوکرین کو نیٹو میں شمولیت کے ارادے ترک کرنے ہوں گے، روس کو ان چار یوکرینی علاقوں پر مکمل کنٹرول ملنا  چاہئے  جنہیں وہ اپنا حصہ قرار دیتا ہے اور یوکرین کی فوجی صلاحیت کو محدود کیا جانا  چاہئے  ، تاہم  یوکرین ان مطالبات کو مکمل طور پر مسترد کرتا ہے۔

دوسری جانب کریملن کے ترجمان دمتری پیسکوف نے بھی اس تنازع کو بہت پیچیدہ قرار دیتے ہوئے کہا کہ معاملے کو حل کرنے کیلئے  سفارتی کوششیں درکار ہیں۔

روس  نے  دعویٰ کیا  ہے کہ وہ یوکرین کے توانائی انفراسٹرکچر پر حملے نہ کرنے کے امریکی معاہدے پر عمل کر رہا ہے۔